សៀមរាប៖ បុរសជនជាតិចិនម្នាក់ បើករថយន្តមិនប្រយ័ត្ន ជ្រុលទៅបុកខ្លោងទ្វារស្ពានវត្តព្រហ្មរ័ត្ន បណ្តាលឲ្យខូចខាតទាំងរថយន្ត។
ហេតុការណ៍នេះបានកើតឡើងកាលពីវេលាម៉ោង១២និង៤៥នាទីរំលងអធ្រាត្រឈានចូលថ្ងៃទី២៤ ខែធ្នូ ឆ្នាំ២០២៤ ស្ថិតនៅតាមបណ្តោយផ្លូវពោធិ៍កំបោរ មុខវត្តព្រហ្មរ័ត្ន ស្ថិតក្នុងភូមិមណ្ឌល១ សង្កាត់ស្វាយដង្គំ ក្រុងសៀមរាប ។
រថយន្តបង្កម៉ាកហុងឃ្យូ HS5 ពណ៌ខៀវ ពាក់ស្លាកលេខ ភ្នំពេញ 2CA-5186 ដឹកអ្នករួមដំណើរ៣នាក់៖ ឈ្មោះ WANG NANJIE ភេទប្រុស អាយុ៣៣ឆ្នាំ ជនជាតិចិន និងអ្នកបើកបរឈ្មោះ PHAN THI NGOC HAN ភេទស្រី អាយុ២៤ឆ្នាំ ជនជាតិវៀតណាម។ និងឈ្មោះ LUO LITAO ភេទស្រី អាយុ២៥ឆ្នាំ ជនជាតិចិន។
អាជ្ញាធរបានរាយការណ៍ថា រថយន្តបានរងការខូចខាតយ៉ាងដំណំ ហើយខ្លោងទ្វារស្ពានរងការខូចខាតយ៉ាងខ្លាំង។ ចំណែកអ្នកបើកបររថយន្តទាំង៣នាក់រងរបួសស្រាល។
តាមការស្រាវជ្រាវបឋម គ្រោះថ្នាក់នេះ បណ្តាលមកពីល្បឿនលឿនហួសល្បឿនកំណត់ ខ្វះការប្រុងប្រយ័ត្ន ដោយងងុយដេក ឬស្រវឹង សង្ស័យជាកត្តារួមចំណែក ។ ក្រោយការបុកគ្នានេះ ប៉ូលិសចរាចរណ៍បានសាកសួរលោក WANG NANJIE ដែលបញ្ជាក់ថាគាត់ជាអ្នកបើកបរ និងម្ចាស់រថយន្ត ។
ជាសំណាងល្អ មិនមានយានជំនិះផ្សេងទៀត ឬអ្នកថ្មើរជើង ចូលរួមក្នុងគ្រោះថ្នាក់នេះទេ។
សមត្ថកិច្ចកំពុងបន្តស្រាវជ្រាវ និងកសាងសំណុំរឿងចាត់ការតាមច្បាប់៕
